Skrifgedeelte:
Skrifgedeelte: Romeine 7: 14 – 25 (2020)
Fokusverse: Romeine 7: 24 en 25a
Liturgie:
Vooraf
Selfstandige Skriflesing: Romeine 8: 1 – 4 (2020)
Ontmoetingsdiens
Intreelied: Psalm 46-1: 1 en 6; Votum; Groetseën; Loflied: LB. 190: 1, 2 en 3; Geloofsbelydenis (12 Artikels);
Verootmoedig en versoeningsdiens
Wet: Eksodus 20: 1-17 (2020); Verootmoedigingslied: Psalm 119-1: 1 en 2 (Eerste Melodie);
Woorddiens
Gebed;Skriflesing; Prediking; Bevestiging van Ampsdraers; Sing: Psalm 134: 4;
Antwoorddiens
Gebed; Liefdegawes; Slotsang: Psalm 138-1: 1, 2 en 4; Uitstuurseën. (Amen – SB 13-3)
Preekskets:
In Romeine 7:14 – 25 beskryf Paulus die werklikheid van die gelowige se voortdurende stryd met sonde. Hy sê: “Die goeie wat ek wil, doen ek nie; maar die kwaad wat ek nie wil nie, dit doen ek.” Tog is dit juis hierdie gedeelte wat wys dat die gelowige se verhouding tot sonde verander het. Paulus sê dat hy die kwaad haat, dat hy hom in sy diepste wese oor God se wet verbly en dat hy verlang om die goeie te doen. Die sonde is nog in hom teenwoordig, maar dit is nie meer sy koning nie.
Dit is die volgende stap in ons reeks deur Romeine. Ons het gesien hoe God ons vrede met Hom gee deur Christus; hoe genade oor sonde triomfeer; hoe ons met Christus verenig word tot ‘n nuwe lewe; hoe God ons uit die slawerny van die sonde bevry; en hoe sy heilige wet die sonde in sy ware afskuwelikheid ontmasker. Nou leer Paulus ons dat die Christen hierdie nuwe lewe steeds in ‘n werklike stryd met oorblywende sonde leef.
Daarom is Romeine 7 nie die verhaal van ‘n mens wat Christus verloor het nie. Dit is die verhaal van ‘n mens wat juis deur Christus geleer het om die sonde te haat en sy eie onvermoë te erken. Paulus se vraag word ons vraag: “Wie sal my tog red uit hierdie doodsbestaan?” En sy antwoord is die hart van die evangelie: “Aan God die dank – deur Jesus Christus, ons Here!”
Hierdie waarheid is ook belangrik wanneer ons ouderlinge en diakens bevestig. Ons bevestig vandag nie mense wat sonder swakheid of sonde is nie. Ons bevestig mense wat, soos elke gelowige, van Christus afhanklik is. Die kerk se hoop lê daarom nie in die volmaaktheid van haar ampsdraers nie, maar in Jesus Christus, die Here van sy kerk, wat sy kinders deur sy Woord en Gees gebruik om Hom te dien.
Lees Romeine 7:14 – 25 en vra: Is ek moedeloos omdat ek nog met sonde worstel, of leer ek deur daardie stryd al hoe meer om my verlossing in Christus alleen te soek?
