Preekskets:
Verlede Sondag het ons uit Psalm 50 gehoor hoe die Here ons leer om ons gesindheid reg te rig teenoor Hom wanneer ons in gebed voor Hom tree. Lof en dankbaarheid is die offer wat die Here wil hê. Nie uiterlike gebare of ondeurdagte woorde of optredes nie, maar ʼn opregte erkenning van wie Hy is en wat Hy vir ons gee.
Daarom, wanneer die Here Jesus sy dissipels leer om te bid, begin Hy by die offer wat die Here wil hê. ʼn Erkenning van wie Hy is: “Ons Vader, wat in die hemel is”, en dan die eerste bede: “Laat U Naam geheilig word.”
Dit is ook presies waar die digter in Psalm 115 begin. Hy sê: “Nie aan ons nie, Here, nie aan ons nie, maar aan U Naam kom die eer toe, want dit is U wat liefde en trou bewys.”
