Preekskets:
Ons het verlede Sondag geleer uit die drie gelykenisse in Lukas 15 dat die Here moeite doen om sy verlorenes te vind. Die klem val natuurlik op “Sy Verlorenes”. Dit beteken, Sy eiendom. In hoofsaak het ons geleer dat die Here se kinders, hulle wie werklik in Hom glo, nooit totaal verlore is nie. Dalk vir ’n tyd lank “verdwaal” of “verlore in hulle weë/sinne”,
maar nooit werklik “weg” nie.
Dit beteken daar is ’n belangrike deel wat nie geïgnoreer kan word nie. Sy verlorenes moet terugkeer na Hom toe. Hulle moet “gevind” word. M.a.w. hulle moet tot bekering kom. Vandag sien ons hoeveel blydskap daar by God is wanneer sy kinders terugkeer na Hom toe. Solank as wat iemand “weg” van God af is, is so iemand so goed soos dood. Maar wanneer hulle terugkom na Hom toe, is dit soos om terug te keer na die lewe. ’n Oorwinning wat ’n feesmaal regverdig!
