Preekskets:
In ons nabetragting op die viering van die Heilige Nagmaal verlede Sondag, sien ons hier in Handelinge 20 die gevolg van die Here se Hand in die bediening van die Woord en die Sakrament. Dit dien tot versterking van geloof. Natuurlik nie sonder “praktiese uitdagings” nie…
Op die eerste dag (die Sondag) het die gelowiges bymekaargekom om die bediening van die Woord en die Sakrament te ontvang. ’n Jong man met die naam Eutigus word egter vaak en val tot sy dood.
Hierdie moegheid van Eutigus kan natuurlik in die letterlike sin van die woord verstaan word, maar dit dra ook ’n dieper betekenis vir ons. Dit dui ook op geestelike “flouheid”.
Die uiteinde natuurlik… na afloop van hierdie gebeurtenis het hulle die seun lewend huis toe geneem en was hulle uitermate bemoedig. So gebruik die Here ook fisiese dinge soos die bediening van die Woord en die Sakrament, om ons deur sy Gees in ons geloof op te bou en te versterk (opnuut lewendig maak).
