Preekskets:
Uit Handelinge 1 en 2 het ons reeds die belangrikheid van die verkondiging van Christus geleer. Dit is nie iets wat nou gaan afneem nie, maar net meer en meer sal toeneem soos die eerste gemeente groei in liefde, geloof en dade. Dit is soos die stroom water wat uit die tempel vloei waarvan Esegiël geprofeteer het. Orals waar dit vloei, bring dit lewe!
Wanneer ons vandag aansit aan die tafel van die Here om die Heilige Nagmaal te vier, doen ons dit met hierdie selfde besef. Dat die Here vir ons tasbare en sigbare tekens gee om Hom mee te kan onthou. Verder is die Nagmaal ook vir ons die seël as versekering/waarborg dat God ons beslis na liggaam, siel en gees wil verkwik, net soos die brood en wyn dit uitbeeld.
Dit is tot opbou en versterking van ons geloof. Net soos ons hier in Handelinge 3 sien dat dit suiwer op grond van geloof in Jesus Christus was, dat daardie man “verkwikking” en daarom genesing in Christus kon vind.
Kom na die tafel van die Here en kom vind jou verkwikking in Hom.
