Preekskets:
Die agtergrond: Jesus is op pad na Jerusalem. Die kruis wag op Hom. Hy het ‘n derde keer dit duidelik aan sy dissipels gestel dat die mense Hom gaan doodmaak. Wie en wat is Jesus Christus vir hulle?
Uit Jerigo het Hy met sy dissipels en ‘n groot skare na Jerusalem gegaan. Soos die dissipels het ook die skare nie verstaan dat die Here gaan om te sterf nie. Hulle wou Hom koning maak. Die Here het hulle geleer om te glo en te dien, maar die insig het ontbreek.
Wie en wat is Jesus Christus vir jou, hoe sien jy Hom?
Buite Jerigo het ‘n blinde man, Bartimeus, gesit, ‘n bedelaar. As hy hoor dit is Jesus wat verbygaan, roep hy na Hom. Dit gaan nie soseer oor die feit dat hy roep nie, maar oor wat hy roep: “Seun van Dawid, Jesus, ontferm U oor my1” en “Seun van Dawid, ontferm U oor my!”
Wie en wat is Jesus Christus vir die blinde?
Jesus gaan staan, roep hom, hoor sy noodroep en genees hom liggaamlik en geestelik. Dit is die groot behoefte van elke gelowige – om deur die Here aangeraak te word om te kan sien – sy heerskappy sorg en ontferming vir ons. Dit moet lei tot “en hy het Hom op sy pad gevolg.”
