Preekskets:
Paulus is na sy derde sendingreis uiteindelik terug in Jerusalem. Soos die Heilige Gees hom telkens verseker het, sal vervolging en gevangenskap daar op hom wag. Maar dit kom op ’n manier wat mens nie verwag nie.
Hy ontmoet daar vir Jakobus en die ouderlinge van die gemeente. Op hulle aanbeveling hernu hy sy gelofte en bring die reinigingshandelinge soos voorgeskryf deur die wet van Moses. Maar dit bring ’n hele kettingreaksie van gevolge….
Wat was Paulus se “fout”? Het hy homself weerspreek deur wettiese reinigingshandelinge te ondergaan… of het dit ’n ander doel gehad?
Deur dit alles sien ons God se soewereiniteit. Niks abnormaal gebeur nie. Eintlik gebeur alles presies soos die Here dit vooraf bepaal het. En tog moet ons raaksien wat die Here in hierdie gedeelte vir ons leer.
Deur alles bly Paulus op koers. Hy hou vas aan sy vryheid in Christus, maar ter wille van die eenheid van die kerk is hy ook diensbaar in liefde.
Of dit deur voorspoed of lyding gebeur, God se raadsplan gaan ongehinderd voort.
