Preekskets:
Ons teksvers is die woorde van die Engel van God aan Hagar, terwyl haar seun besig was om van dors te sterwe. Krisisoomblikke, emosioneel en magteloos. Skielik stel jy ‘n beeld voor van
– ‘n sterwende kind
– ‘n magtelose, huilende ma
– en ‘n ontfermende God.
Met ‘n Jeugdag as vakansiedag, kan ons vanuit ‘n Bybelse perspektief delf om God se goud in ons jeug te ontgin. Daarmee saam, moet die lig val op die verantwoordelikhede en uitdagings van ouers en volwassenes ten opsigte van ons jeug. Die insig kan alleen volledig wees wanneer ons met geloofsoë raaksien hoe God die Here ons in ons swakheid ondersteun en bekwaam maak om Hom te eer.
Die eer kom Hom toe, omdat Hy in Christus self Kind geword het. Hy het nie alleen sy verlossingsplan vir sy kinders vervul nie, maar roep ons om vanuit die verlossing in hoop en liefde te lewe. Weet dat Hy altyd sy woord gestand doen en met ons is.
