Preekskets:
Hierdie verse in Handelinge 21 wys nie net Paulus se vasberadenheid nie, maar in besonder al die gelowiges se praktiese uitleef van die inhoud van die “Onse Vader” gebed.
Om te bid: “Laat u wil geskied”, is meer as berusting by die wil van God. Dit is aktiewe onderwerping aan die wil van God.
Toe Paulus se vriende en medegelowiges probeer het om hom te oorreed om nie na Jerusalem te gaan nie, maar gesien het dat hy oortuig is om te gaan, het hulle nie gesê “ja gaan, maar weet ons stem nie saam nie…” Hulle het hom as’t ware vergesel met die seën van die Here. Hulle het gesê: “Laat die wil van die Here geskied.”
Met ander woorde: Hulle het nie “opgegee” nie, maar hulleself “oorgegee” aan die wil van God, selfs al het hulle geweet wat dit beteken.
