Preekskets:
Geliefdes in ons Here Jesus Christus, met die lees van ons Skrifgedeelte is daar sekere gedagtes wat jou dadelik aanspreek. Kom ons noem dit:
• Die woorde van die sieke wat al agt en dertig jaar aan sy kwaal gely het. EK HET NIEMAND! Hierdie woorde maak seer.
• Die tyd – dit was ten tye van ‘n Joodse fees in Jerusalem en almal was op pad om fees te vier. Vir meeste vanselfsprekend, maar ander was uitgesluit sonder dat dit enigiemand gepla het.
• Batesda – die plek in Jerusalem met die betekenis “Huis van genade”. Dit was sommer by die tempel en tog so ver verwyderd van die tempel, so ver dat niemand die man nog ooit gehelp het nie.
• Die man se aanklag en Jesus Christus ons Here wat daar is en luister, hoor en genees! Dit is aangrypend! Meteens is daar IEMAND op die sabbat, God se dag. Hy gee nuwe betekenis aan die fees van die Jode en die Sabbat. Hy staan daar as die Iemand wat na ons gekom het, opsoekend, reddend, genesend met die vraag vir elkeen: “Wil jy gesond word?”
Hy was die enigste wat niemand en Niemand gehad het. Sy roep aan die kruis sny hoendervleis deur jou: “My God, my God, waarom het U My verlaat?” Sy belofte aan ons is “Ek is met julle tot aan die voleinding.”
Op ons reispad na die ewige fees in die nuwe Jerusalem, het ons die sekerheid dat Hy ons hand stewig vashou en deur sy Gees ons lei.
