Preekskets:
‘n Persoonlike en intieme verhouding met die Drie-enige God, is die beginpunt en fondament vir die toekoms van ons kerke. Dit mag nie ontbreek nie. Dit moet al ons gedagtes en dade beheers.
Ons word deur die Here Jesus Christus onderrig. Hy gebruik twee mense, vroue, in ons toerusting:
- Martha – sy staan in ‘n baie besondere verhouding met die Here. Sy is gasvrou
en baie bekwaam omdat sy kos kan voorberei en onthaal. Haar hande staan vir
niks verkeerd nie en dit is vir haar so belangrik om die Here en sy dissipels, haar
gaste, met net die beste te trakteer. Haar “regstaan” word nie afgewys nie. Sy
wil haar alles aan die Here gee. - Maria – sy staan ook in ‘n besondere verhouding met die Here. Te midde van al
die gejaagdheid het sy haar tuisgemaak aan die voete van die Here om na Hom
te luister. Die Here sê vir Martha – dit wat Maria gekies het, is noodsaaklik. Dit is
die een ding wat vir enige mens onontbeerlik in die lewe is. Jy kan nie daarsonder
nie.
Die noodsaaklike bring ons by die persoon van Jesus Christus ons Here uit. Aan sy voete, in sy teenwoordigheid word jy ‘n ontvanger van lewe – ewige lewe. Aan sy voete kom die strome van lewende water deur sy Gees na jou toe.
