Preekskets:
‘n Volk in ellende – die ellende van ballingskap. Ballingskap was vir hulle die onbegryplike werklikheid. Hoe kon God dit toelaat – uit jou vaderland in die vreemde en agter jou die puin van ‘n verwoeste stad en tempel? Waar is God?
God is by hulle, selfs in die ballingskap. Hy herinner hulle aan sy trou in sy verbond en maak vir hulle die nuwe tydperk bekend van terugkeer na hulle vaderland. Glo hulle dit?
God eis vertroue en geloof van sy volk en kerk! Die opmerking: Hoe kan God dit toelaat en selfs: Waar is God? Dit is mos nie vreemd nie. Die talle vrae in ons eie gemoed maak die woorde van die HERE vir ons so aktueel: “Ek het jou getoets in die smeltkroes van ellende”.
Sien ons, verstaan ons die HERE se beskikking? Nog groter ellende het ons Here Jesus ter wille van ons oorval – die vloekdood van die kruis; Godverlatenheid, die verseëlde graf. In sy oorwinning bemoedig en troos Hy ons deur sy ontferming en versekering dat Hy met ons is tot aan die voleinding van die mensegeskiedenis.
Is dit jou geloofsoortuiging?
