Is ons ooit te onbenullig vir God? Is ons belange ooit te klein vir God dat Hy Hom sal besig hou met wat ons bekommer? Ons is gering, dis waar. Maar ons is nie vir God onbelangrik nie. Dis oor mense ons maklik afskryf dat ons begin glo ons is nie veel werd nie.
Hierdie Psalm se eerste twee verse is vir ons baie bekend. Dit is ’n belydenis… die “Votum” wat ons so te sê elke Sondag aan die begin van die erediens hoor. Dit begin met ’n vraag wat so half in benoudheid gevra word, maar dan in vertroue self geantwoord word. Ja, my hulp is van die Here!
Soms loop dinge skeef…. al doen jy die regte ding…. Of so voel dit vir ons…. Ons sit dikwels in ’n situasie waar dit lyk of ons goeie intensies soos water van ’n eend se rug afloop.
Paulus gee in sy “eerste opgetekende” toespraak ’n kort en bondige opsomming van Israel se geskiedenis, en beklemtoon die feit dat God hulle as ’n volk vir Hom uitgekies het… met ’n doel… sodat Jesus as Verlosser uit hulle gebore sou word.
